Archive for 2007 年 10 月

區議會選舉,真係笑爆嘴

十月 22, 2007

區議會選擇,從來都不是社區培力的場域。至少,我並沒有看見有任何一個候選人,把社區培力放進他/她的政綱裡面,現在的參選人,還是沿用一貫街坊保長(或者戲稱為「理事長」)的態度,去增取選民支持。諷刺的是,這種選舉賣點,明明就是叫市民不用為社區落力,不用為社區建設付出,但政府的宣傳廣告卻依然沿用投票=為社區付出這個logic,還找來我們心愛的明哥來拍這一張嘔心的照片──這張應該係近年明哥最唔cool的相。

自從2003年的區議會選舉,泛民打出「民主vs親建制」這一張牌之後,有點食髓知味之味似的,今年繼續用呢條橋;而親建制派看來也不甘示弱,民建聯拿拿淋收起那班蛇宴阿叔,找來一群較後生的,打「專業人士」路線。當然,呢d咩咩柒柒的所謂大政治(或我輩戰友所說的「狹義政治」就真係興趣不大,那些分析都係留返畀那些紫菜學者做吧!我這裡就和大家分享一下一些區議會選舉觀察得到的micro-politics

1) 區議會選舉一到,大財團小商戶立即現形

公式:大財團一定唔畀貼競選海報,貼得海報的一定係小商戶

譬如,以元朗教育路一帶為例,唔係間間舖頭都有選舉海報貼出來,細心看看,Neways老麥Mannings數碼通一定無海報,有的通常都係街坊小店

2) 如果候選人係街坊,可以看看社區政治

以屯門兆置選區為例,有三個候選人:現任區議員(民主黨)、教師(民建聯)、區內一五金水電舖老闆。五金水電舖老闆的店,有大大條自己的banner,而又無其他候選人的海報,就非常正常;但我較為有興趣的,係阿五金水電老闆方圓五分鐘步距的舖頭,有間唔係佢同行的舖頭,另外兩個候選人的海報都有貼,唯獨唔貼阿五金水電老闆。本來地頭蟲應該係有唔少優勢,但係咁樣的情況,看來佢都唔係同自己社區的人相處得怎樣好!

3) 獨立人士當街坊係傻B

每年都有唔少「獨立人士」,被 踢爆其實係隱形XX黨員;今年,直情有「獨立人士」當街坊係傻B。話說,竹園某位自稱「獨立人士」的候選人,個幾月前我才在樂富地鐵站外面見到一張嫻姐搭住佢膊頭影的banner。需知道,竹園人唔係搭巴士小巴,就係在樂富地鐵站或者黃大仙地鐵站落車轉乘其他交通工具/行路返屋企。雖然竹園多老人家,但係唔代表老人家唔出街的,你咁都可以話自己係獨立人士,真係當街坊係傻B。(Similar case有灣仔區某「獨立人士」候選人實為范婦人的助理)

4)  吹水唔抹嘴之我大佬係行會成員

元朗區某個候選人,在叫咪的時候,說到點解要投佢一票時,竟然講到佢地黨高層係行會成員有助直接反映意見給政府高層。咁講法,不如以後d參選人索性為特首係我契哥,契哥一定照住我 !?唔知係唔係佢突然諗起呢種講法有唔妥,即刻唔在講,繼續重申自己的政綱係爭取增加生果金同醫療券。話時話,既然你地黨高層係行會成員,點解你還在說你要爭取這樣那樣,唔係應該話你已經成功爭取到增加生果金同醫療券呢咩!?

廣告